今日收市後,滙控(005)同恒生(011)派半年成績表。兩份成績表,對短期港股走向起左右作用。滙控盤數估計中性,恒生盤數估計偏淡。
上海石化C輪9102:上周五紐約油價再升啲,對中石油(857)、中海油(883)兩隻石油股有利,但相關C輪已成支箭咁上升,高追有風險。
上海石化(338)可炒追落後,如果油價下跌,佢嘅石化生意又可得益。
揀上海石化C輪埋手,可供選擇不多,最熱門嘅係9102,成交金額有19球,其他5隻,得兩隻有少少成交,而且全部數據冇隻睇得上眼。
9102明年6月底夠鐘,輪價34仙,溢價14.2%,槓桿率8.1倍(有效4.2倍),引伸波幅40.7%。數據唔算靚,不過短炒冇問題。
網通C輪3457:近期國內電訊股好生猛,惟獨網通(906)稍稍濕滯,升過12元又再升無力,上周五收11.90元。有差不多兩個禮拜,喺12元以下等破位,估計隨時彈上去,係時候買定C輪。
網通C輪又係冇乜得揀,3457係唯一選擇,隻輪明年1月到期,輪價1.50元,溢價6.6%,槓桿率7.9倍(有效5.4倍),引伸波幅31.2%。
章盛