代理行每逢搞誓師大會、領銷售大獎呢類場合，都會預先準備橫額，到時一排人拉住影相，成為指定動作。 利嘉閣一眾高層，唔知係咪拉上癮，竟然將呢個習慣用喺婚禮上。話說嘉華地產營業經理顏景鳳，與測量師楊偉禮日前結婚，利嘉閣帶埋印有「利嘉閣祝楊偉禮夫婦白頭到老、永結同心。」嘅橫額到賀，一對新人與利嘉閣高層，又係一排人咁影相（見圖），唔講真係以為又賣廣告。