立法會班議員個個都仔大女大，好似自由黨張宇人咁，年頭做咗老爺娶新抱，年尾又準備嫁女，做其外父。
八方問佢呢個暑假會唔會同老婆仔女出埠，佢話唔會咯，老婆自己一個返咗美國同班舊同學reunion，個大女就為籌備十一月嘅婚禮唔得閒陪佢，另一個女就要返工，所以呢個假期嘅節目，竟然係同鄭家富以及李國英去泰國、挪威同埋愛爾蘭考察人哋禁煙嘅情況。
三個男人去旅行，你話係咪悶到抽筋？不過，張宇人就覺得冇問題，咁總好過一支公坐喺香港唔知做乜。
講開佢位未來女婿，佢話係個女嘅中學同學，嗰時冇嘢，喺美國見番先至擦出火花，個婚禮會喺美國舉行，所以一啲都唔使老竇理，你話幾好。
傳真︰2623-9278
電郵︰[email protected]