賓架Ｌ快人快語，做事劍及履及，從澳洲買來新襪ComputerSocks，飛機運到，送三對畀左丁山試吓，堅決唔肯收番錢，惟有等機會請佢食番一餐補數。
餐廳Ｒ話佢搵咗一位身兼意大利菜、法國菜廚藝，曾任巴黎三星飯店主廚嘅意大利人來港教路一個月，亦為食客服務，每位收費五百。左丁山話：「今時今日，收五百蚊，貴啲喎，私房菜收費不外二百五、三百。」餐廳Ｒ一聽見私房菜就會撞火，因為前幾年私房菜盛行之時，搶咗佢唔少生意，現在私房菜式微，只剩番幾間有料到，對攞正牌嘅餐廳冇威脅，但餐廳Ｒ認為食環署、消防處對正牌餐廳查得好嚴，增加咗經營者成本；但係對啲私房菜就手鬆，覺得好唔公平，用英文講，就係冇levelplayingfield，所以佢經常寫電郵畀飲食界議員張宇人，表達不滿。
餐廳Ｒ的電郵去得多，收到議員嘅回應就少，有一次佢猛咁追問，從消息人士得知，張議員嘅官方電郵地址每日收到垃圾電郵太多，不勝其擾，助理每日刪除之，刪得太快就連餐廳Ｒ啲電郵都刪晒去，所以張議員根本唔知。送傳真又點呀？議員又係收到垃圾傳真太多，未必睇得到。故事教訓就係，要與你的議員保持清晰接觸溝通渠道，一定要另想辦法。
唔講私房菜，講豬肉牛肉，餐廳Ｒ一樣勞氣。佢話美國牛肉、日本牛肉已經唔可以進口，𠵱家四川豬肉又出問題，在在影響食家食慾。佢話：「做西餐廳賺錢不易，又要望天打卦，如果逢星期五、星期六都落大雨，蚊瞓咯，生意冇咗一大截，再加上禽流感、豬瘟、瘋牛症嘅傳言，我哋真係頭都大。」餐廳Ｒ冇一個有錢老竇，故此頭大。潮流興富豪第二代（三十歲以下）搞餐廳，蝕咗有老竇找數，蘇豪區、中環就有好例子，呢班公子千金蝕極都唔會頭大。