近排芬佬已經唔多肯揸中小型工業股，連對民企股的興趣亦大減，噚日又話爆出廣東科龍（921）同埋格林柯爾（8056）位老總有多少頭暈身㷫，經紀黃就斷言，民企股將陷入風雨飄搖的狀態，隨時又成為芬佬大力沽售對象。
小初問經紀黃使唔使講得咁誇張？佢就反問小初，睇唔見國美電器（493）同埋大成生化（809）等股價都持續低迷咩，尤其係國美電器，自月初公布銷售數字，反映毛利下跌後，股價就一直表現麻麻。
查實自從大陸公布人民幣升咗值後，唔少大陸零售股如聯華超市（980）等，都被芬佬看高一線，相反國美股價就繼續唔多掂。
經紀黃話，自國美在7月初公布1至5月份銷售數字雖然上升，但毛利率下跌後，芬佬就已經心淡，加上大陸家電零售競爭劇烈，雖然仍有證券商仍口硬話維持國美的買入評級，但目標價就已經大幅調低，當中發生咩事，睇嚟都唔使多講。
國美上周五跌4%，收報4.80元，成交股數484.6萬股，金額2369.5萬元。
慕容小初