許仕仁前兩日秘密訪京，搞到啲立法會議員好鬼㷫，唔知佢會唔會背住港人，同北京秘密傾政改方案。長毛噚日就同八方講，一定會送本《浮士德》畀肥龍。暗寸肥龍好似浮士德為知識出賣靈魂畀魔鬼咁，將港人嘅前途出賣晒畀中央。
長毛話，唔好講佢訪京，佢連住緊喺禮頓山層樓同地產商有乜關係都交代含糊不清，認真唔掂啦，佢應該改改名，加番個「也」字係前面就啱晒。咦，咪即係叫做「也許是人」？
八方記得以前除咗麥理浩之外，好少官會秘密返大陸，但唔知點解呢幾年愈嚟愈多人咁做，梁錦松就掛住上京追女仔；煲呔曾就明去朝聖、暗見廖暉；老董就成日返深圳。肥龍好學唔學，學埋晒上一手同煲呔嘅衰嘢，好彩有朋友喺機場昅到話畀八方知，如果唔係佢就可以瞞天過海，肥龍呢鋪真係抵打！
傳真︰2623-9278
電郵︰[email protected]