鍾鎮濤（阿B）前晚在樟木頭登台時，一名男fans攞住汽水跑上台請他飲，卻噴得他一身都是，最終被保安請下台。
鍾鎮濤、陶大宇、湯寶如、阮兆祥、李龍基、薰妮、朱咪咪和彭家麗前晚在東莞樟木頭觀音山會展中心演出《群星共聚樟木頭》，一位男fans攞住一罐汽水走上台想請阿Ｂ飲，但因為他揸住汽水跑上台，在開罐時汽水噴出，更通通噴到阿Ｂ身上，阿Ｂ即時黑面，男fans則被保安請下台。
拖着Fans合唱
內地的fans畢竟十分熱情，有女fans衝上台攬實阿Ｂ，亦有女fans上台送花給陶大宇，大宇還拖着該名fans一同獻唱，𠱁得對方暈得一陣陣。
對於內地實行不能咪嘴演出，阿Ｂ表示對自己冇影響，他說：「我覺得得一個情況之下可以咪嘴，就係舞蹈動作太大，本來咪嘴就係為呢個情況而設嘅。不過我個人睇嘢好正面嘅，咪嘴嘅歌手係賣點唔同啫，佢哋賣嘅係樣同埋色，唔係賣歌藝，各有所長啦。」
阿Ｂ又表示大前晚有看徐小鳳的演唱會，對於演唱會中途腰斬，阿Ｂ說：「我覺得好心噏，開場時聽到佢把聲已經知有啲唔妥，小鳳姐唔知我在場，如果唔係，佢頂唔順我可以幫手唱住先。之後我有同佢通電話，佢當然好唔開心啦，我叫佢休息多啲，我都冇乜養聲秘方，唔舒服都係睇醫生，其實聲沙個個都有，小鳳姐都係要求高啫。」
湯寶如再出唱片
此外，湯寶如將在十一月出新唱片，她透露喉嚨生繭，所以錄音時很辛苦，她說：「如果開刀就要一段好長時間開唔到聲，而且我知好多人做完手術都唔係好成功，我之前休息咗一排，把聲好番好多。」對於王菲下嫁李亞鵬，湯寶如表示十分羨慕對方，她說：「如果遇到啱嘅，我會學王菲，掟低晒所有嘢結婚，我𠵱家冇人追，劉小慧笑我如果佢個女十幾歲，我都未嫁得出，就頒個獎畀我。」
採訪、攝影：蔡丹
