在舞台上，聲音是一件重要的兵器。舞台劇演員都很懂得運用聲音，閉上眼睛單是聽他們講對白，也聽得到戲味。
不試過還不知道，原來自己屬於那種大聲便自以為好戲的人，導演說：「你是一個被囚禁了一千年的壞蛋，如今脫牢籠，所以在肢體上及聲音上都好好伸展一下。」「啊！」我點頭說道：「明白。」我以為伸展的意思便是有咁嘈得咁嘈，於是便放大喉嚨嗌對白，結果是半天下來，嗓子啞了。
「到演出時其實是有咪高峯的，所以其實唔使咁大聲，」導演婉轉地說，「不過個意識係好嘅，不過其實又真係唔使咁大聲。」導演循循善誘，但我仍不大明白如何可以在聲音中凝聚多點力量，於是轉問監製高志森，「啊，好簡單啫，入去演藝學院苦練五年啦，」監製即係監製，一針見血，「講笑啫，」高監製見我呆呆滯滯，於是畀番多少鼓勵，「其實今次演出嘅係一個兒童音樂劇，觀眾對象係小朋友，所以最重要係小朋友睇得開心，諗得太多，演出反而可能唔夠投入，重有，小心睇住自己把聲，唔好到演出時已經嗌到冇咗聲。」監製即係監製，第二針都見血。
於是謝絕了九成九的課外活動，可以唔講嘢就唔講嘢，最多去戲院睇場戲，齋聽唔使講。另外，口袋中永遠預備了一大堆喉糖、金嗓子、佛手瓜、清音丸、八仙果，飲的是羅漢果水、葛菜水、蜜糖水，真係潤過周潤發。