莊士機構（367）今年2月以來，一路兜緊底，家陣剛啱兜緊圓底另一邊，又要埋位。莊士本港投資物業總共26.75億銀，佔咗隻股總資產值55%水位，收租資產成份唔嘢少。又當莊士投資物業重估增值行人止步（97年投資物業估值一度扯到上42億銀），以05年度（3月止）最新NAV2.06元計數，現價折讓66%。
莊士要拍埋一線藍籌地產股比折讓，冇乜意思，家陣市值同莊士差無幾、投資物業質素又一樣咁筍，兼夾收租成份重嘅有漢國（160），NAV折讓45%，另一隻渝太地產（075）折讓49%，莊士好明顯落後。拍住同級數收租股，折讓收窄到50%，莊士要見1字頭。又呢勻莊士兜緊圓底，頸線位0.79元，若兜上頸線位，潛在回報一成過外，唔心急，等埋破位，抽上圓底量度升幅，講緊0.96元。講時講，圓底目標價，同佢追落後，NAV要收窄到50%時嘅目標價差無幾，技術同基本因素，出奇脗合，加強信心。
金威上落車要快
金威（910）由上年6月到家陣，足足跌咗成年，到上星期五0.117元為止，累積跌幅超過7成，又講兩點：金威到上年底手頭現金1.27億銀，借貸不過兩球貨仔，手頭淨現金1.25億銀，每股淨現金4.2仙，開始有淨現金墊底效應。第二，打開港交所（388）網頁，「上市公司訊息搜尋」有關金威嘅訊息，幾乎清一色係回購，均價講緊重係0.124元至最高0.14元水位，金威現價相對公司回購價，潛緊水。當現價兜轉計，博升兩成水位，啱啱好係公司呢期回購上限位。事先講明，博反彈無包生仔，上落車要快。
錢雋