由○四年開始轉軚唱好樓市嘅地產界大好友、明星級分析員、瑞銀投資研究部董事總經理林奮強，早前賣咗三個單位，估計淨袋咗九百萬，令人懷疑呢個係唔係佢轉軚嘅訊號呢？林奮強噚日同八方講，佢賣單位，主要係想套現部份資金，做其他投資啫！
八方又追問，到底係乜嘢投資呢？林生話佢搞緊嘅投資類似基金，會係一大班人去搞，唔止佢一個人，同地產亦有啲關係，但實情係點就要賣個關子。林生重補咗句，人一定要懂得分散投資，呢度賺咗錢，就要諗辦法保住啲錢咁話喎！
講開又講，林奮強噚日喺個研討會上，當然重繼續看好樓市，不過，佢除咗用結婚數字、供款佔薪金比重，及樓字供應呢啲基本數據做支持外，重用咗離婚數字㖭！林生話，離婚人士即原本要一個單位，變為要再用多一個單位，咁即係需求增加囉！八方真係冇諗過。
爆料熱線：29290000、27860099
報料傳真：26239278
報料電郵：[email protected]