（一）七月十九日本欄提及學習英文前置詞冇捷徑，之後收到好幾位讀者電郵，有英文，有中文。讀者Ｓ留學英國多年，承認Ihavehadproblemswithprepositionsfordecades；李小姐話：「本人有大專教育程度，但仍感力有不逮」；黃先生話佢位千金在澳洲讀書，英文成績甚佳，希望多學習運用前置詞；其他讀者就要求指出書名及出版社，等佢哋去書局搵。
讀者Ｓ話上過亞馬遜網站搵，唔知邊本係。左丁山為咗服務讀者，喺屋企書架上搵咗半個鐘頭（搵咁耐因為蝸居細小，書籍滿地，要搵番啲陳年舊書都幾辛苦），只搵到下冊，唔見咗上冊，書名KeytoEnglish:Prepositions（CollierMacMillanEnglishProgram:TheKeytoEnglishSeries）。亞馬遜網站指示：呢本書係outofprint-limitedavailability，可能唔易買。
（二）幾位讀者來電郵反對香港電台停止播馬，要左丁山做牽頭人，組織馬迷去反對。多謝嘞，左丁山自問無此能力，各位馬迷不如用一人一信方式，寫信去廣管局向馮華健投訴，向曾俊華投訴。
（三）一位讀者見到某高價名牌雪糕賣廣告，推出「哈密瓜」味道雪糕，懷疑該廣告用錯字，應該係「哈蜜瓜」，不是「哈密瓜」。呢位讀者不可誤會，廣告用「哈密瓜」係啱嘅，查番辭海，有「哈密」一條，「哈密」係縣名，屬新疆，「土地肥沃，植物頗富，尤以瓜產名，曰哈密瓜」。舶來品honeydewmelon，就應該譯為「蜜瓜」，不是「密瓜」。
（四）一位讀者將到台灣升讀大學，主修政治，想話修讀邱吉爾嘅演講辭，一來學英文，二來可以知道邱吉爾嘅政治理念。嘩，呢方面嘅書就多咯，亞馬遜網站有大把介紹，讀者Daisy可以參考吓。如果你係要左丁山介紹，我自己有一本TheWickedWitofWinstonChurchill（DominiqueEnright編，MichaelO'MaraBooks出版），可以作為入門初階。