汪明荃自認野蠻，只要認為是對的話，便不會理會其他人說甚麼，跟《我》劇角色有點相似。不過，說到劇中野蠻奶奶經常欺負家姑這方面，卻是剛剛相反。
據知，阿姐經常送家英哥母親禮物，𠱁得老人家開心不已，早年便送上勞力士金表，相當闊綽。另方面，家英哥早前亦向外透露，阿姐曾向他表示，若家英哥病情有變化，她願意代家英哥照顧羅伯母終老，可見阿姐對家英哥十分好，對老人家又是何等疼錫。對此阿姐笑道：「我一向對老人家都好好㗎。」
怕男友操勞
記：知道家英哥患上癌症之後，會唔會對佢溫柔啲，或者係遷就佢多啲？
汪：都係咁啦，係關心佢多咗啲，不過，最近佢情況好咗，都唔使我擔心咁多。羅家英其實係一個好識照顧自己嘅人，例如佢戒口戒得好清，識得唔好咁操勞，就算踢波，佢都只係係咁意玩吓，一星期練一次波，咪當係做運動強健身體。
記：家英哥身體狀況好咗，會唔會一齊再拍檔做粵劇？
汪：唔會啦，遲啲我會同李龍拍檔做粵劇，我同羅家英拍咗檔十幾年，觀眾都希望有啲新鮮感㗎，而且，粵劇武打動作太多，羅家英唔係咁適合做，佢唔可以太操勞。
記：家英哥話你曾經向佢求婚兩次，有冇咁嘅事？
汪：唔講啦，費事佢講一句我又回應一句，成日講羅家英，冇啲新意。
稍後阿姐將與家英哥到歐洲旅行，寄望二人歐遊返港會有好消息公布。
撰文：戴彩煥
攝影：仇志德
髮型：HairbyKelvinKoo
場地提供：霞飛路
