近幾年喺香港上映嘅韓片數目似乎有超越日本片嘅趨勢，不過諗落其實韓國同日本嘅愛情片都幾唔同，日本愛情片裏面嘅女主角都係溫柔型，唔似得好多韓片嘅暴力型，講到近年日本愛情片天后，又點少得竹內結子，喺今年4月上映嘅《藉著雨點說愛你》，呢個星期終於推出DVD，喺套戲裏面竹內飾演一個靚媽咪，相信大家睇完之後，都好想有個咁嘅阿媽！
記者：梁瑋瑜
今年喺香港上畫嘅日本片較為收得嘅包括有《在世界中心呼喚愛》同埋《藉著雨點說愛你》，全部都係賺人熱淚嘅作品，入親戲院嘅不論男男女女都喊住出番嚟，而呢套《藉著雨點說愛你》唔單止講愛情，親情都佔好重要部份，無論同女朋友定係同阿媽一齊都好啱睇。
離世媽媽雨季再現身
媽媽澪因病過身，死前同爸爸巧同埋仔仔佑司講，雨季嘅時候佢會再返嚟，雖然聽落好荒謬，但係兩父子抱住希望咁等，直到有一日雨季開始，媽媽真係返咗嚟，雖然呢個媽媽好似咩記憶都無，但係仍然一樣咁溫柔美麗，所以佢哋無問任何問題，只係享受珍惜同媽媽相處嘅日子。澪嘅出現，帶畀巧久違咗嘅愛情感覺，亦都俾佑司重拾家庭溫暖，兩個唔開心嘅人生命出現番曙光，可惜短短六個星期嘅雨季始終要過去，澪亦都要離開，留下一本日記，而呢本日記就透露咗佢出現同埋離開嘅來龍去脈。
選角出色值得一讚
講到呢度，梗係唔會咁快開估啦，結局留番畀大家自己慢慢睇。竹內結子有幾靚就唔使多講，驚喜嘅地方係飾演爸爸嘅中村獅童外表雖然生得好戇直，但係做呢個角色就非常之稱職，因為佢論論盡盡，製造咗唔少笑料，而飾演仔仔佑司嘅武井証唔單止生得可愛，重係非常入戲，令到人一睇到佢嘅表情就投入喺戲裏面，喺選角絕對值得一讚。喺現實世界裏面，竹內結子重真係嫁咗畀中村獅童㖭，呢件事令到呢套戲更加之圓滿。
一家大小都啱睇
《藉著雨點說愛你》其實係由一本小說改編而成，套戲同埋小說嘅日本名原本係《現在，很想見你》，記者就認為原名比較傳神，亦都同劇情呼應番，大家睇嘅時候可以留意一下。呢齣戲記者睇嘅時候雖然係喊足全場，不過睇完嘅時候係帶住幸福滿足嘅心情離場，同一般苦情戲完全唔同，大人細路都咁啱睇。今次隻DVD重加送拍攝花絮、導演訪問等等嘅BonusFeature，只喺DVD上面睇到，大家唔好錯過！
售價：$98
查詢：DVDPro(23326326)
地址：旺角奶路臣街6E德發商場地庫B4舖
