一向形象嚴肅的汪明荃（阿姐），在新劇《我的野蠻奶奶》中豁出去，飾演一個既巴辣又搞笑奶奶，與鐵嘴雞新抱胡杏兒鬥法，首周平均收視有三十四點，同時贏得口碑。演慣正正經經花旦的阿姐，亦表示萬料不到自己潛藏在心底的喜劇細胞如此豐富，今回一次過爆發出來。
創新篇：往日花旦今潑辣
下月便五十八歲的汪明荃，最近在無綫劇集《我的野蠻奶奶》中破格演出，扮演一個既野蠻、又搞笑的奶奶角色，效果令觀眾喜出望外，想不到一向嚴肅無比的阿姐，原來也可以如此鬼馬，絕不比其男友羅家英遜色。不知阿姐今次演喜劇，事前可有參考一下羅家英的搞笑作品？
汪：汪明荃 記：記者
汪：唔知點解，我真係冇乜睇佢嘅戲。
記：有冇參考其他喜劇演員嘅作品？
汪：咁就有，我睇占基利（JimCarrey）同積尼高遜（JackNicholson）嘅搞笑片，另外，許冠文以前嘅笑片，或者係周星馳嘅無厘頭電影同鄭中基咁，我都有留意。不過，我唔係因為今次演喜劇先至睇，係以前一邊睇嘅時候收收埋埋，我自己平時一本正經，又唔講得笑，哈，估唔到自己下意識原來咁多喜劇細胞。
自創小動作
記：拍喜劇嘅心理負擔係咪冇咁重？
汪：對我嚟講，拍喜劇嘅心理負擔重大，因為我以前演嘅角色都好內斂，從來未試過搞笑，所以今次當自己係新人㗎。我唔想做到以前黃曼梨嗰種惡家婆咁乞人憎，我希望個角色野蠻得嚟有可愛一面，好在拍之前，我已經有齊十集劇本，可以研究吓個角色，自己設計啲小動作，好似戚眼眉咁，咪係我自己諗出嚟嘅。
講真，初初我都幾擔心出嚟效果唔好，又怕個樣唔靚，話晒我以前做親都係花旦靚女，而且當時我同胡杏兒都唔熟，又唔知套劇嘅定位，真係覺得幾難做。但做落咗之後，發覺胡杏兒做鐵嘴雞好夠放，對手係咁喺度發功，自己冇理由咁輸蝕，收埋唔去接招㗎嘛，所以我咪豁出去做，唔理咁多。
睇好胡杏兒
記：電視台目前有咁多花旦，有冇邊位可以做你電視方面接班人？
汪：胡杏兒真係做得好好，如果唔係之前啱啱播完佢嗰套《同撈同煲》同《情迷黑森林》，肯定今次佢個鐵嘴雞角色一出會重出位。楊怡同埋黎姿都唔錯，尤其是黎姿，佢喺《金枝慾孽》裏面玉瑩小主角色，其實係咁多個角色當中最難演嘅一個，一方面要扮純情，一方面又要奸險，真係好難做㗎。
阿姐一向喜歡新嘗試新挑戰，問她會否考慮演《男親女愛》或是《男人之虎》這類舞台劇時，阿姐不諱言也有興趣，並隨即叫助手訂購《男人之虎》的門票，莫非阿姐準備向詹瑞文偷師？
