由前特首夫人董趙洪娉一手倡議同促成嘅「香港青少年軍事夏令營」，唔經唔覺已經過咗十二日，噚日喺粉嶺新圍軍營舉行結業典禮，董太以名譽主席身份用普通話致辭，唔知係咪卸任特首夫人之後少咗主持公開活動生疏咗，幾頁紙嘅講稿睇嚟佢讀得好辛苦，猛咁食螺絲兼讀錯字，「井井有條」讀咗「井井有題」；「出色」又讀咗「出息」。可能加上落雨關係，令到佢心都亂埋，幾頁紙嘅講稿，揭過咗一頁之後竟然失暈到搵唔到下一頁，忽然間停咗好幾秒，連坐喺佢身後嘅董生都戥佢心急，皺晒眉頭咁，直至佢繼續讀到落去先至鬆番口氣。
到演詞嘅最後部份，佢向台下一百名畢業嘅「小兵哥」講，同佢一齊手握拳頭，向主辦呢次夏令營嘅單位大喊兩聲「謝謝」以示由衷感謝，但係台下小兵哥卻冇反應，仍然正襟危坐冇人響應，要佢老人家鍥而不捨再次重複手握拳頭嘅姿勢，小兵哥先至聲勢如洪咁跟住佢連嗌「謝謝、謝謝」。
唔記得幫董太擔遮
當董太返埋位冇耐，個天就落起大雨，一眾解放軍大兵哥急急腳走上台幫出席嘅嘉賓擔遮。唔知點解坐喺董太左右兩邊嘅解放軍司令都有士兵擔遮，惟獨漏咗董太，要佢喺度淋雨。董太眼見自己冇人遮，忍唔住急急腳攞起把大會供應嘅遮嚟自己擔，嗰時左邊嘅副司令員董文久先至發覺唔妥，即時叫身後嘅士兵移去幫董太擔遮，至保住佢唔使成身濕。
去到結業禮尾聲，一百名小兵哥向一眾嘉賓、家長同校長表演一套十六式軍體拳，經過十二日改造後，不單止耍得有板有眼，重拳拳有力，連坐喺董太身邊隔咗一個位嘅董生都忍唔住技癢，喺位度揸拳推手咁模仿台下學員嘅姿勢。睇嚟令佢要辭任嘅腳痛，已經唔再困擾佢咯。
講番呢一百名參加夏令營嘅青少年，佢哋個個都好似脫胎換骨，八方記得入營時訪問佢哋嗰陣重係嬌生慣養嘅少爺兵，但噚日見到佢哋真係好似變成一個誓要保家衞國嘅準軍人。連教統局常秘羅范椒芬都大讚計劃成功，重諗住出年再搞。
爆料熱線：29290000、27860099
報料傳真：26239278
報料電郵：[email protected]
