行政會議成員梁振英雖然係商界出身，但見報時，佢多數係講政治。中大EMBA論壇最近搵咗振英哥講香港營商環境。佢話，香港政府統計處有個「二五仔」嘅說法。「二五仔」係統稱嗰啲星期二上內地、星期五先返香港嘅男士。佢哋周末陪家人，星期一留喺香港公司處理業務，或做報告。佢又話自己喺怡和大廈返工，早上繁忙時間搭電梯時，電梯乘客都係女士，男士不知所終。
振英哥又畀貼士嗰啲想喺內地發展業務嘅港人，要好似「雨後春筍」咁。佢話老闆要你管一項內地業務，不論係乜業務，五年內都有翻兩番嘅機會，所以要膽大心細，要有快速起動嘅能力，就好似「雨後春筍」。
筍係竹嘅幼苗，雨後春筍嘅意思係「快」。冬天時只有筍尖露出地面，冬筍不斷吸收、儲藏養料，但唔長高，到咗春天，一兩場春雨過後，一夜間就長成六七呎，點解一夜間啲竹生到咁高？一株新嘅竹樹喺地面破土而出時，周圍係二、三十呎高嘅竹，如果唔喺短時間內長高、同周圍競逐陽光，佢就會枯萎。振英哥自己間測量師行搞嘅中國業務，係咪循住呢個方向做呢？
爆料熱線：29290000、27860099
報料傳真：26239278
報料電郵：[email protected]