三隻油股，帶住個市升。恒指進帳67點，中海油（883）貢獻39點。國指升69點，中石油（857）與中石化（386）總共貢獻49點。油輪意氣風發，有啲嘅數據都重係相當靚，但累積升幅唔小，要上車最好注碼輕輕。
駿威C輪4837：駿威（203）大量成交，收3.05元，升4.3%。花旗美邦預測駿威中期只多賺3%，但設目標價3.60元。豎起幡杆，炒友埋位。駿威C輪得4隻，3隻標輪，當中9285急升80%，由2.5仙飛上4.5仙，成為是日輪王。隻輪11月中夠鐘，溢價10.3%，槓桿率13.6倍（有效6.6倍），引伸波幅40.2%，睇數據，博唔過。4837明年2月尾夠鐘，輪價44仙，溢價7.9%，槓桿率6.9倍（有效4.6倍），引伸波幅36.3%。駿威升勢能否持續，兩睇，炒駿威C輪，食得鹹魚抵得渴，高追有風險。如果一定要落場，4837比較啱睇。
中石化C輪3732：中石化（386）升兩格，C輪3732升38%，收16.2仙，打入龍虎榜第6位。隻輪溢價1.1%，槓桿率20.8倍（有效15.6倍），引伸波幅15.6%。表面數據OK，1.1%溢價唔算得係乜，但要留意隻輪下月9日最後買賣，睇睇日曆，得7日炒。睇好中石化嘅話，揀壽命長嘅C輪埋手，穩陣啲。
東亞C輪3604：東亞C輪3604由1.5仙升上2.5仙，升幅67%。隻輪9月初夠鐘，行使價25.5元與正股（023）現價相差1.85元，隻輪最後作廢可能性係99%。東亞C輪總共5件，冇邊隻吸引。
章盛