本欄於七月十八日引述《Media》，講及一位Procter&Gamble新加坡嘅CountryMarketingManager，只有二十五歲，名叫JopaMalantic。一位讀者AlvinNg心水清，上網翻查呢位先生嘅資料，俾佢搵到呢位神童於一九九六年畢業於菲律賓DeLaSalleUniversity，一畢業就加入菲律賓P&G做AssistantBrandManager，一路升級。計番起嚟，佢大學畢業之時，只有十六歲，真神童也！唔怪得二十五歲已經咁威。
七月三十日睇新聞，知道會德豐集團標售連卡佛大廈，估價二十至二十五億。連卡佛已經搬咗去國金二期，由吳光正千金吳宗恩小姐打骰。報紙話吳小姐於○二年連卡佛私有化之後，就成為掌門人，當年只有二十五歲，真神童也！另一位吳小姐Jessica，奉乃父吳鴻生之命，負責雜誌出版業務，接任之時，好似未夠二十五歲，真神童也！另外富豪酒店羅旭瑞之千金，約莫二十五歲，負責晒富豪酒店業務，真神童也！
如果你唔係神童，二十五歲重係頭岳岳，等米落鑊，唔使怪自己咁多噃，話唔定二十六歲就會行大運呢。一位讀者來英文電郵話：「我今年三十二歲，感覺到老闆喜歡聘請二十五歲左右嘅年輕人，佢哋教育程度高過我（好多位有碩士學位），人工低過我，做咗一兩年，已經可以做得我嘅七成工夫，相信佢哋好快會替代我！好彩，我可以替代我嘅上司，我嘅教育程度好過佢，薪水低過佢，已經可以做到佢嘅工夫七成以上！所以我嘅結論係：唔使驚啲二十五歲，最驚就係你嘅下屬可以做到你嘅七成工夫，而你重未可以做到上司嘅七成，呢個就係被炒魷迹象嘞！」
讀者Ｄ講得真好，正是剃人頭者，人亦剃其頭，悲哀者，到咗「三個五階段」（曹仁超術語，中五程度，五十歲，五萬銀人工），前無去路，後有追兵，只有向老闆送上人頭。