市面上教人影相嘅書籍林林總總，大把選擇，不過對於啱啱買部DC嘅初哥嚟講，唔係每一本都咁啱用。事關好多書都太着重理論，而且偏向深奧，一般新手根本得物無所用。今個星期就新返咗一本以DC新手為對象嘅攝影工具書，名為《水着攝影全攻略》，齋聽個名已知本書食正炎炎夏日，個個爭住去沙灘游水個Timing，而且大多帶埋部DC去威，玩之餘重可幫女伴留倩影，所以本書都幾啱呢類人士。
由淺入深一條龍講解
書內除咗介紹沙灘拍攝技巧同注意事項外，重會講埋全港熱門沙灘交通表，較特別係有埋比堅尼選購、防水DC介紹，甚至連化妝技巧都教埋㖭！書後更有「5分鐘執相技巧」同「燒碟逐一教」，等大家簡簡單單學會後期工作，絕對係「一條龍」式講解，就算手持一部儍瓜DC，都好易影到一手靚相，比一般DC教學書籍更為多元化！書內超過五百幅相片，學影相之餘，睇吓比堅尼靚女，都不失為大熱天之降溫良方。
重量級禮品隨書附送
隨《水著攝影全攻略》附送兩大禮品，第一係20頁純影集，全本書仔以18歲人氣ModelKarina為主角，好有青春版林志玲Feel，用埋厚磅書紙印刷，值得珍藏！另一樣較實用，就係特大屏幕保護貼，就算部DC個芒有成2.7"都啱用，若係2"芒嘅話分分鐘可以剪兩張㖭！呢兩樣贈品令《水着攝影全攻略》更為抵買，就算睇完學識所有招數，當係靚相寫真集珍藏都得！
記者：朱崇德