好多日本藝人都係憑住阿哥或家姐嘅名氣加入藝能界，好似安倍夏美個妹安倍麻美、窪塚洋介細佬窪塚俊介等等，而最近尊尼組合NEWS成員山下智久個十七歲妹妹山下莉奈亦加入咗藝能界。不過，莉奈好似唔想咁高調，只係以藝名莉奈（RINA）參加選美，但好多fans都知佢其實係智久個妹。
身材標青
原來莉奈試過做雜誌嘅讀者模特兒，最近佢重參加咗由日本雜誌《WeeklyPlayboy》搞嘅選美MissWeeklyPlayboy，雖然莉奈攞唔到冠軍，但亦入選三甲，相當威水。最近莉奈重幫雜誌拍咗輯水着寫真，雖然佢嘅面形比阿哥智久腫脹，但身材都算標青，莉奈亦喺網上開咗個blog寫低佢拍寫真嘅感受。
此外，另一隊尊尼組合KAT-TUN嘅成員赤西仁，佢個十七歲細佬赤西禮保，最近亦參加咗年輕演員選拔賽「第2屆D-BOYSAUDITION」，重入圍十六強，不過，禮保喺拍攝自我介紹照片同片段時，下巴貼咗塊大紗布，原來佢因為玩後空翻時撞親個下巴喎！