寵物花園:<br>辦公室巨兔跳跳跳肥到無纖腰

寵物花園:
辦公室巨兔跳跳跳肥到無纖腰

小力是一個喜歡吃零食、正餐食Double的普通OL,不排除不久有機會上電視,跟阿叻和家庭觀眾分享牠的成功瘦身故事。牠,其實是一隻胖胖的家兔,饞嘴的牠產後一直收不了身,遷怒於老公肥仔,但如無意外,肥仔會有一個鏡頭講一兩句打氣說話。只是革命尚未成功,小力仍須努力,欣宜做到的事,你都應該做得到!

記者:邵超 攝影:周旭文

由細睇到「大」

家兔的尺寸本來就可以很巨型,但親眼看過小力的巨躉,衷心鼓勵牠展開纖體療程。主人Doris悄悄告訴小記,小力聽見「肥」字確實有所反應,奈何忍不了多少時間,又再飛身撲埋食物堆裏,營養特別高的BB糧更是牠的至愛。小記亦不排除牠有自暴自棄的想法,這種危險的思想正在磨蝕牠減肥的決心。

■小力剛出生已有半隻手掌大,屬先天性肥胖。

■BB有大肚腩,真係世間少見!

■跟在媽媽身邊,小小力(中)都唔覺咁肥。

■體重12磅,真係要減減。

■把尺放低咗,但都有21吋喎。

■辦公室裏跑步減肥,主人Doris都算用心良苦。

家變改變了小力

辦公室女郎經常坐多過運動,種下肥胖因子,Doris表示小力跟同胎生的肥仔和小雞,一出生已經有半隻手掌大,較一般初生兔仔大咗三分之一。先天不足後天為食,不努力KeepFit的牠結果真係超磅。「小力個子矮小,睇起來特別胖,即係又肥又矮啦。牠又為食,似阿媽腳仔幼,支撐成個身體特別辛苦,唔減唔得。牠產後一直收唔到身,從此嬲咗肥仔搞大佢個肚。」
前文提及,小力跟肥仔、小雞係三胞胎,牠們四個月大時,肥仔就「衰十一」,害小力懷孕,近親相姦。可憐小力未老身先肥,從此對肥仔不瞅不睬,應該捉肥仔上寵物法庭(可惜無呢!)。

■Barbie以打交嚟操Fit小力一家,都算創新。

胖兔上班族

交代一下小力的背景,由於Doris把兔子養在辦公室,所以小力的家前舖後居,祖孫三代都是為Doris打工。爸爸朱古力、媽媽阿黑、哥哥暨丈夫肥仔、大妹小雞和細妹細細佬、大女白手和二女金毛,加埋異姓親戚糯米雞和堂妹Barbie和自己合共十兔,每天的工作就是吃東西和睡覺,放工就去做運動。如此優差真係邊度搵?!難怪小力的身形膨脹得如此快。
一聽「放工啦」,十兔就如脫籠野兔四處走,擺下地雷陣,搞到老闆娘Doris早晚變身清潔阿嬸替牠們做善後工作。「每日都要放牠們出嚟,跑吓隻腳有力啲。每朝同夜晚,都要花個半小時清潔。小力最乖,牠會幫手照顧其他兔,幫其他兔沖涼(用脷舔),似足大家姐。有時叫牠唔使成日洗籠及廁所,但牠真係好鍾意做。」

辦公室爭寵風波

小人唔可以得罪,在兔仔世界都係一樣。Doris唔講真係唔知,兔仔外表良善,原來好鬼小氣,記仇最叻,有時重會影響牠的性格。爸爸朱古力是一個典型例子:「朱古力曾經被遺棄,初來甫到時,好驚被人再次遺棄,所以好嗲好乖任珍珠雞搓圓㩒扁。珍珠雞死後牠做咗大佬,新來的糯米雞就被牠打,次次打到血流披面。牠惡咗但仍然好驚出街,可能遺棄的事對牠傷害好深,所以記得好清楚,驚出街之後無得返屋企。牠又特別嗲,有次糯米雞被牠打得好傷,牠又睇唔過眼我哋照顧糯米雞,故意搞到自己病要我哋照顧,牠就覺得自己好重要。」施苦肉計,朱古力,你係得嘅!

小力家族譜

性格:驚驚青青,嗲人,行為反叛引人注意,受人重視。

性格:注意力集中,比較自我,不喜與兔仔玩,愛呷醋。

性格:爛玩愛無故跺腳,樣子蠱惑其實好蠢,經常帶細細佬搞事。

性格:經常擺出一副智者不屑一顧樣,彈跳力驚人,喜愛粟米片。

性格:聰明但懶,懦弱但硬頸,懂得自己開門入房。

性格:安全感不足,喜愛跟媽媽一齊睡覺。

性格:性格自閉,反應慢幾拍,個個玩完抹完身返房牠至出來。