報業風起雲湧，但今次嘅焦點落喺兩大地產代理集團上，真係想唔到。話說中原份免費報紙《am730》今日面世，對手美仔噚日突然喺三份報章推出「美聯729物業專訊」，之前一日市場傳言四起。
噚日美仔就解畫，話佢哋唔會出報紙，只不過喺三份報紙賣廣告，主要提供對樓市睇法同資訊。美聯執董陳坤興話，喺三份報紙嘅廣告合約最長兩年，傾緊喺其他報紙落同類廣告。集團請咗資深傳媒人顧國泰任董事，負責出版業務，八月上班。
點解叫「美聯729物業專訊」？佢話唔係衝住《am730》而嚟，只不過「快人一步，人哋落後一步」、「咁啱喺呢個時辰出世」。企業拓展董事謝梓旻就強調，呢份物業專訊堅持「三個絕不」宗旨，絕不會搞個人主義、絕不會擾亂傳媒生態同絕不會馬虎。
另一邊廂，施老闆自資出版嘅《am730》，雖然今日只係派發試版，數量唔會好多，不過對於呢個初生BB，施老闆都幾緊張，聽聞佢今朝早八點半就會去到連接灣仔會展嘅天橋，親自派報紙。至於本港第一份免費報紙《都市日報》，一直擺喺地鐵任人攞，但今日都會搵高層喺九龍塘派。至於搶喺《am730》之前發行嘅《頭條日報》，早上上班時段，會喺全線加德士油站派發。
電郵地址：[email protected]