大市係咁升，上市公司批股集資潮又起，唔好話大隻國企如江西銅業（358）早前出嚟批股集資，連細細隻嘅都話要抽水集資，噚日就輪到勤+緣（2366）就批股而停牌，據班經紀老友講，幾乎人人都收到電話問要唔要貨，照咁情況睇，間公司復牌後股價將會好波動。
江湖傳聞勤+緣今次以先舊後新方式，每股1.83元，配售6000萬股，集資額1.08億元咁多，集資嘅用途，據講話係喺大陸搞媒體生意。查實勤+緣舊年上市至今，股價直至前一排先開始係咁抽上，停牌前作價2元，接近全年高位，配售價1.83元，話就話有8.5%折讓，但抵唔抵，就見仁見智。
至於早排批過股後股價一度勁跌嘅亨泰（197），呢兩日就重拾升軌，昨日升8%，收1.48元。經紀黃話，雖然亨泰size唔大，但批股獲得唔少芬佬支持，先至反彈得咁快。亨泰早幾日以先舊後新方式，每股1.25元，配售1.64億股，集資2.05億元。股價升得返上去，芬佬帳面即時賺咗。
慕容小初