八方噚日收到一篇文章，開頭係咁嘅：「這個夏天，特別酷熱。海灘成了我們避暑的好地方……」文章係來自政府新聞處，開頭八方重以為新聞處趁暑假舉辦小學生徵文比賽，叫啲參賽者講吓暑期活動。
再睇落去又唔同：「因為不太會游泳，人又貪玩，差點兒遇溺。幸好有救生員，一把把我拉回岸上。」大難不死、由救生員執番條命嘅，就係民政事務局局長何志平。救生員下星期一罷工，何志平唔正正經經同佢哋開會商討，反而選擇匿埋一二邊寫篇〈給康樂及文化事務署救生員同事的公開信──向緊守崗位的救生員同事致敬〉，真係估佢唔到。
擺明分化救生員
文章愈寫愈誇：「市民能否有一個快樂的夏天，能否有一個既放心又安心的游泳環境，全繫於你們身上。」大家如果想有一個惹笑的夏天，不妨上網慢慢歎： http://www.info.gov.hk/gia/general/200507/29/07290278.htm。不過參與罷工嘅救生員就冇佢咁好氣，發起工業行動嘅郭紹傑話，閒時唔見何志平慰問吓啲救生員，呢個風頭火勢就無啦啦貢出嚟「向緊守崗位的救生員同事致敬」，擺明搞分化。郭紹傑愈睇愈火滾，文章提到：「政府的政策目標是……為市場創造更多商機和職位。」郭紹傑話何志平咁講好有問題，救生員既然係佢偶像，就唔應該當救生服務係商機，當救生員係商品啦。
傳真︰2623-9278
電郵︰[email protected]