個市反覆，推上去之後回吐壓力唔輕，跌落去之後買意亦好盛。恒指埋單微升11點。滙控（005）唔見80仙，拉低恒指29點，中移動（941）上升30仙，則拉高恒指19點。
滙控C輪4875：滙控下周一派中期成績表，有大行睇得淡淡哋，例如瑞銀估計半年少賺9%，亦有大行睇好，例如美林估計多賺9.8%。按照習慣，滙控盤數下周一收市後見人，即係有足兩個交易日畀炒家買定離手。
滙控兩隻熱門C輪3682與3821，昨日分別大散25%與22%。3682風險好大，下月26日最後買賣，咪理有幾大槓桿率，畀3.6%溢價，好易係咁先。3821下月25日最後買賣，畀0.5%溢價，值博率好過3682，但始終時日無多，賭得嚟個心跳吓跳吓。滙控如果忽然跌得多啲，博反彈，諗吓隻4875，年尾到期，輪價41.5仙，溢價2.3%，槓桿率30.4倍（有效16.7倍），引伸波幅11.6%。
新地C輪4821：新地（016）高低波幅95仙，收市跌30仙。吼住回吐幾毫，買C輪4821，炒短線，執6-8格獲利做快閃黨。隻輪11月初到期，輪價62仙，溢價1.5%，槓桿率12.9倍（有效10.8倍），引伸波幅15.1%。
章盛