無綫新紮小生黃宗澤去年是非不絕，令其事業陷入低潮，但經一事長一智，敢於公開認錯的黃宗澤，寄望在他主演的喜劇《我的野蠻奶奶》中，借用「野蠻格格」汪明荃及「鐵嘴雞」胡杏兒之力，用笑聲再度打動觀眾的心。
獲無綫力捧的小生黃宗澤，近年負面新聞多多，先後被揭結交損友、遭前同居女友數臭食軟飯及被指是電視台𠝹女王，去年北上拍攝無綫劇集《覆雨翻雲》期間，又在夜店發生遭爆樽事件，令剛嶄露頭角的他事業直插谷底，直至近日無綫播映他主演的喜劇《我的野蠻奶奶》，人氣才稍見回升。
經一事長一智
黃宗澤日前在將軍澳接受本報訪問時，提到是非纏身一事時，他說：「之前發生好多事，有得亦有失，得嘅係令我變咗，以前唔識同人相處，講嘢會令人覺得唔好受，經過呢啲事之後，個人長大咗，係經一事長一智，學識好多嘢；失嘅係事業，同埋令到好多人唔鍾意我。」
問黃宗澤有否覺得自己做錯事？他坦白地說：「有做錯，舊年算係我人生中從未試過嘅低潮期，我惟有不停做嘢，同朋友傾吓偈嚟度過。」再問黃宗澤是否曾結交損友？他說：「都有嘅，以前我會以為識多個朋友冇壞，慢慢至覺得有啲嘢係不經不覺感染咗，我已經選擇疏遠佢哋。」
感謝公司信任
提到形象花弗，黃宗澤則苦笑說：「我唔係電視台𠝹女王，我同人好快熟絡，同朋友溝通啫。」
雖然負面新聞不斷，但黃宗澤卻表示從未因此而被公司「照肺」，他說：「公司好相信我，繼續畀機會我拍嘢，所以我對《我的野蠻奶奶》好有期望，因為劇本好好之餘，亦估唔到阿姐（汪明荃）會咁演，希望憑呢套劇令到觀眾對我改觀。」
