前Boy'Z成員關智斌（Kenny）、雷頌德高徒側田和黎明師弟應昌佑，在今年芸芸男新人中暫時彈出，日前他們齊到海洋公園玩高卡車及泡泡活火山，作年尾音樂頒獎禮賽前熱身。Kenny獲兩名外籍女郎邀合照，豔福無邊。
今年樂壇男新人湧現，其中單獨發展的前Boy'Z成員關智斌、雷頌德門生側田與黎明師弟應昌佑，各具風格，亦同樣獲後台撐腰，暫時在芸芸男新人中已率先彈出。
日前三位大男孩齊到海洋公園內的「夏水禮」，驕陽下玩高卡車，在年尾樂壇頒獎禮舉行前先來個賽前熱身，爭奪男新人王寶座。三人作友誼較量後，再到泡泡活火山感受漫天泡泡的氣氛，其間有數名穿比堅尼的外籍女郎對Kenny情有獨鍾，主動要求與他影合照。
側田自嘲核突
對於勁敵當前，行唱作人路線的側田說：「我同Charles（應昌佑）同一間大學重同一班，佢好nice、好慷慨，我哋聽嘅音樂差唔多，幾夾㗎。我之前亦都有聽Boy'Z嘅歌，再聽Kenny唱嘅《分手不要太悲哀》時，覺得佢進步咗好多。」
問側田自覺有甚麼過人之處？他自嘲說：「又矮又白，啲人講嘅唱得又作得，係音樂需要啫，我願意做最核突嗰個。」Kenny聞言即一臉認真地說：「唔係呀，我覺得你對眼幾靚喎。」
應昌佑則說：「我首新歌都係側田寫畀我嘅，新人獎頒畀邊個唔代表一切，咁壓力當然有，會有推動力。」未知應昌佑有否向黎明取經？他說：「有傾偈，佢話唱歌唔好有其他人嘅影子就最好，佢有畀意見我，我都努力緊。」
Kenny爭獎有愧
三人中最「資深」的Kenny則說：「我第一次見側田係喺古巨基演唱會，佢喺台上好有光采、好搶鏡。我問朋友佢係咪會今年出碟，跟住就好擔心啦！而應昌佑好忠直、又高大，好保護到女仔，好有住家男人嘅感覺。」
Kenny續說：「我出道三年啦，都唔好意思㖭，所以我唔會當自己係新人，角逐新人獎係公司安排，我唔會理咁多，最緊要係做好自己嘅嘢。」
採訪：朱倬誼
攝影：葉君海
髮型：[email protected]（Kenny）
