舊年八月先至因為對沙士事件負責而請辭嘅醫管局前主席梁智鴻，落台唔夠一年又火速獲政府委任新公職，接替譚耀宗做安老事務委員會主席。靜咗一排又有新挑戰，梁主席都唔知幾咁興奮，就算早排有人話佢冇做安老服務經驗，佢都唔當係批評，只覺得係新挑戰咁話。
梁智鴻話，政府喺一個禮拜前問佢有冇興趣做呢個位，佢就好樂意咁接受咗呢份新任務。一向中間分界、唔見有一絲白髮嘅梁主席，原來已年過六十五，佢話自己都係長者，新工作做得好，對佢都有好處；做得唔好，對自己都有損害，叫大家一於放心。除咗梁主席外，政府重委任咗嶺南大學社會學及老年學教授陳章明做副主席。
傳真︰2623-9278
電郵︰[email protected]