肥龍同煲呔呢對孖寶兄弟，有福同享，有難同當。煲呔去咗四川，肥龍睇住個場做咗三日署理特首，不過完全冇公開活動。到煲呔返歸，肥龍仍然潛水，不見蹤影，連前晚香港友好協進會咁大型嘅愛國愛港活動都見唔到佢，究竟佢搞乜？於是八方問政務司司長辦公室，佢哋答話肥龍唔係個個活動都去，今晚無綫電視有個乜嘢各界頒布基本法十五周年，佢有被邀，到時應該會見到佢。
潛龍勿用臨時爽約
肥龍潛咗水，噚朝煲呔嗰早禱會都冇出現，八方聽聞青年會有間中學原本噚朝請咗佢老哥去學校講可持續發展，佢臨時say晒sorry話去唔到，佢身邊嘅人猛話佢有急事要做，所以爽約。
講兩講，有個老友打電話畀八方，話噚日朝頭早，見到一個貌似肥龍嘅物體喺機場出現，好似上咗架飛去北京嘅飛機；之後又有朋友話見到佢晚上喺禮頓山出現。唔通佢老哥咁厲害，早機去晚機返，秘密訪京？
肥龍雖然見首不見尾，但自從佢回歸政府，特區都算平平安安。有個別高官對八方話，同肥龍開咗幾次會，覺得佢好掂，likeabreathoffreshair（好似吸到一口新鮮的空氣咁），令人心曠神怡。加上佢老哥成日笑笑口，從來冇見過佢發脾氣，呢一樣，煲呔簡直冇得比。
當然亦有人話肥龍好識走位兼錫身，雖然未至於懶過條蛇，但肯定唔屬於勤力嗰款，呢樣就煲呔贏番幾分。但係，勤力有鬼用咩，老董夠晒博啦，朝七晚十一，咪一樣要下台。
肥龍今次突然復出，政壇大佬飛哥都睇唔通，佢同八方分析，以肥龍喺新地做顧問年薪過一百萬美金計，佢返政府實在少收好多，加上只做兩年，屬過客玩票性質，點解肯制呢？當年老董亦搵過佢出山做財爺，佢又拒人於千里，莫非肥龍有後着，做完兩年之後搵得更多真銀？
兩年後搵更多真銀
飛哥嘅猜測睇怕唔會錯得去邊。有人親口問過肥龍，佢話，真係見過鬼怕黑，唔敢再同老董拍檔，而煲呔話晒幾十年同袍，叫到幫手好難推。肥龍當然有自己如意算盤，所謂為人為己，以佢嘅智慧，應該可以頂得住香港呢個亂局一陣，之後梗係各安天命啦。
傳真︰2623-9278
電郵︰[email protected]