七月二十日本欄講《賓架之襪》，估唔到反應熱烈，除咗朋友來電詢問之外，竟有大量電郵收到，要求公開澳洲襪嘅名稱，一位女士話要買襪畀老公，一位女生話要買畀爹哋，幾位遠在澳洲嘅讀者話想知道，一位Ｖ女士話佢以前留學雪梨，收到大量朋友詢問，個個都當佢係澳洲通。
總而言之，一啲日常小問題，唔好以為係男士個人嘅煩惱，原來所有男士都碰到，對襪就係最好例子，咁多女士來電郵問男人襪，可見「賓架之襪」之惹人注意處。
既然讀者咁有興趣，於是打電話畀賓架Ｌ再問清楚，賓架Ｌ哈哈大笑，好開心咁講：「橫掂呢個牌子喺香港搵唔到，起碼我未見過，講出來唔算賣告白。嗱，呢隻襪叫做HoleproofComputerSocks，Holeproof係言過其實，着得耐，都會穿窿嘅，至於點解叫做ComputerSocks，可能係話由電腦設計咁解，有全棉、全羊毛（wool）、混合毛（woolblended）三種，澳洲朋友話穿羊毛襪就有冬暖夏涼嘅感覺。呢隻襪，在澳洲兩大百貨公司GraceBrothers及DavidJones有售。襪嘅竅妙係橡筋固定於襪筒中上部位，並非於襪筒最上端，於是即使襪筒向下滑移，都唔會滑移得多。每對大約賣十元澳紙，約等於六十蚊港紙。」
講得咁清楚，各位讀者可委託澳洲親友代購。至於使用之後，效果是否理想，請自行判斷，如果唔得，千祈唔好鬧賓架Ｌ與左丁山，否則以後左丁山冇法子徇眾要求，公開答覆讀者。照計香港係紡織工業十分先進嘅地方，做對唔向下滑移嘅襪，有幾難呀？但幾十年來未見過，都幾奇怪。賓架Ｌ話我哋上一輩着襪，有襪帶綁住小腿最肥之部份。左丁山就未見過襪帶嘞，無從考究。