董建華自從做咗國家領導人之後，對祖國嘅信心肯定比以前更大，八方聽聞，佢老哥除咗喺上海買樓買地之外，最近重喺深圳買咗間獨立屋，價值以千萬元計算。
呢個樓盤都算頂瓜瓜，個名叫做波托菲諾（Portofino），好有歐洲水鄉色彩，第一期低密度分層式；第二期純水岸項目中，就有二十三座𡋾墅，今年初開賣，大約五萬蚊一平方米，即係港幣四千六百蚊一平方呎。若以一間獨立屋五百平方米計算，大約要二千萬大元，以老董今日嘅身家，真係好閒啫，佢既然連美國都有屋，大陸多一兩間都唔係乜嘢大件事。
老董𠵱家冇咗私人辦公室，八方噚日冇法搵到佢同董太求證，不過下次有公開場合，各位大姐大哥不妨問吓A1，幾時新屋入伙，反正老董欠班老記一餐，移步去深圳敍舊，怕且大家都唔反對。
傳真︰2623-9278
電郵︰[email protected]