有興趣睇呢篇報道、有番十年八年睇本地漫畫經驗，相信對甘小文、永仁、志文、瑞新、牛佬呢批漫畫家唔會陌生，可惜今年漫畫節佢哋又無影，佢哋缺席肯定唔係偷懶。當大家去會展排隊狂掃精品、攞簽名、睇索女之時，佢哋仍然對住畫紙埋頭苦幹，既然對漫畫的熱誠從未減退，點解唔參加呢個一年一度的盛事？搞到成個漫畫節只有2本薄裝新書登場？全場疏疏落落只有幾間漫畫公司？有無想過以漫畫迷自居的你，寧願花$880買隻亦正Figure而唔睇漫畫，無疑是冷落了這群漫畫家的熱誠？
記者：馬慶武
攝影：陳陶鈞、陳盛臣、楊錦文
熱誠尚在……
志文：做好漫畫家本份
志文認為漫畫迷應該認清一件事——漫畫節的主角應是漫畫本身，已非精品！漫畫迷入場應該為取到主筆親筆簽名而高興，而非排隊排餐死買精品就放番出去炒；漫畫家本身也要負責任，不能濫竽充數，一本薄裝漫畫30頁，就應該30頁都畫得咁精采：「精品唔諗住做咯，做番好自己漫畫家本份先喇，我會繼續改編金庸作品，因為自己十幾歲時已經係武俠小說迷。」
永仁：培養新一代漫畫迷
永仁嘅「雄獅」都算係多搞作嘅漫畫公司，除《絕代》、《霸刀》兩本有穩定讀者群作品外，未來重會推出《Q笑小長今》：「希望啲小朋友唔係淨係識得打機，學吓睇漫畫。」
小文：睇我漫畫你會笑
小文自言不懂畫「正經」漫畫，筆下人物無論主角配角大奸角都醜樣到無倫，用字草根，一睇就令人狂笑不止：「新書唔會玩咁多屎尿屁，希望寫番多啲劇情，用劇情引班讀者發笑，睇漫畫，都係想得啖笑啫。」
租貴時間更寶貴
小文漫畫玩人玩事玩食字，草根但爆笑，又識得追潮流搵題材；志文新作《書劍恩仇錄》全彩稿製作，唔靠分色公司，一手一腳搞掂，有熱誠有水準；永仁擁有極佳生意頭腦，嘗試開拓兒童漫畫市場，極多漫畫賣埠到東南亞甚至歐洲。三位漫畫家齊齊缺席漫畫節，無錢無時間無新作都係理由，不過最重要的理由是──唔想為硬賣精品而出席！
對上一次參加漫畫節係幾時？
小文：「兩、三年前，畫緊《至Goal無敵》。」
永仁：「上年掹車邊有參加，喺SNK攤位出現。」
志文：「4年前，00年畫緊《絕代雙驕》嗰陣。」
唔玩漫畫節，畫緊咩漫畫？
小文：「呢一年都係接散Job做，畫馬會海報、啤酒推廣漫畫咁，8月會出新書《GoalStation》，一次過出晒前、後篇。」
永仁：「《功夫之王》埋緊尾，畫埋《拳皇93》結局篇，就會出兒童搞笑漫畫。」
志文：「全情投入畫《書劍恩仇錄》，朝朝10點開工畫到凌晨一兩點！」
想唔想出席？點解今年唔參加？
小文：「想，可以清吓舊書存貨……聽講今年會展又加租喎，無錢點玩呀？」（揦晒口面，好肉緊！）
永仁：「想，但無精品出，出席都無用，因為漫畫節唔再係漫畫節！都無漫畫嘅！」
志文：「想，好想同讀者見吓面傾吓偈，不過唔參加咯，用多啲時間畫好作品好過參加漫畫節！」
對漫畫節有咩睇法？
小文：「政府應該再多加支持！津貼場租咁啦！」
永仁：「精品玩具玩晒！無癮，漫畫節變晒質！」
志文：「一路進步緊，包容性更大，可以睇到更多同人誌作品，值得支持！」
對漫畫精品有咩睇法？
小文：「好惡做，大公司大量生產先控制到成本。」
永仁：「刀劍熱潮過後，應該無乜嘢會特別好賣。」
志文：「都想將自己嘅漫畫人物立體化，不過順其自然喇，想做先至做。」
點睇漫畫市道？
小文：「重係好差！」
永仁：「讀者群出現斷層，睇薄裝書嘅多數係廿幾三十歲以上嘅人。」
志文：「如果以人口比例嚟講，其實𠵱家都算正常，我覺得幾年前只係泡沫效應。」
有咩救市奇招呢？
小文：「應該出一本綜合漫畫周刊，打破公司間隔膜，一本漫畫10吋厚，有齊《風雲》、《龍虎門》、《GoalStation》甚至黑社會漫畫，一定好賣一定勁爆！不過好似天方夜譚咗啲呀呵？」
永仁：「𠵱家少咗年輕讀者，所以應該向兒童漫畫埋手，從小培養漫畫迷睇港產漫畫習慣。」
志文：「要畀新鮮感讀者，亦要畀新鮮感自己，好似我用全彩稿製作《書劍》，時間用多咗但效果好正，咁先表現到主筆功架、表現到本漫畫有誠意，啲人先肯畀$14。」
黑社會漫畫Fans一星期買7本
黃玉郎與馬Sir兩大巨頭無疑用精品玩晒漫畫節，但黑社會漫畫一樣極受MK仔歡迎。受歡迎當然有原因，唔只一味硬賣暴力，諗頭搞作一樣又多又新，瑞新星期四五六連環出的《火武耀陽》、《耀武揚威》、《火紅年代黑骨棠》就大玩時空交錯Crossover，有點子有誠意本本熱賣；牛佬《古惑仔》更打破港漫傳統，變身3日刊，每星期出兩期。Fans阿熱就一個星期買足5本黑社會漫畫，加埋《龍虎門》同《四大名捕》，每星期用$98買7本港產漫畫，重本本都唔捨得掉，儲到成間房都係：「我呢亭先算真正漫畫迷，漫畫節？No喇！去到都無漫畫睇嘅！」
力數漫畫節必Out事
