袁詠儀（靚靚）同陳小春呢對老友早排喺內地合作拍攝劇集《我家不打烊》，不過佢兩個合作期間竟然嗌大交。噚日馮仁昭打畀靚靚問佢呢件事時，佢就話：「嗰日小春都唔知做乜，一早嚟到就嬲爆爆，邊有人敢行埋佢身邊吖！埋位做對手戲嗰陣，因為企嘅位遮咗我少少，導演叫我企過啲，我又俾張櫈阻住，話行唔到，後來導演話搬開張櫈再拍，咁小春就無端端爆咗句：『不知所謂！』當時我真係有啲㷫，但都忍住。到埋位拍時，見佢喺度借視線，兩次冇望過我，我真係忍唔住啲火，就問佢為乜事要借視線？」
小春嗰時就答佢：「我借咗一次啫！」靚靚即刻反駁話：「你明明借咗兩次！你究竟乜事呀！」跟住兩個就嘈起上嚟，後尾小春嬲到掟埋道具，收工就各自返酒店房。
和好如初
靚靚噚日喺電話繼續話：「嗰時我重一肚氣，小春打電話畀我，我就問佢發乜神經，佢話俾個助手激親，重話我唔理佢㖭！我好在意呢個朋友，所以我先至會咁嬲，我都勸佢改善吓啲脾氣，唔可以成日係咁。我哋咁多年老友，當然第日已經冇事啦。」