井崗山係中國史上嘅革命重地，當年毛主席喺湖南領導秋收起義，建立中國工農紅軍後，井崗山就變咗農村革命根據地，自此成為「紅」人朝聖地。愛國愛港嘅民政事務局局長何志平，又點會未去過井崗山走一轉呢？原來肥平早喺六、七年前，已經去嗰度親身遊歷。佢話嗰趟井崗山之行，旅遊點包括江西瑞金同陝北延安，一睇就知係紅色之旅。
呢期好多瓣嘢都關肥平事，最新傑作係民政事務局考慮喺九月，邀請清華大學教授嚟港，向區議員授課。鄉議局主席劉皇發，早前都話喺暑假搞團北上研習，點知政府失驚無神又搞，令好多區議員縮沙，個團無限期押後，發叔自然好勞氣咁話政府搶客。
不過，肥平噚日澄清，話呢兩壇嘢可以共同進行，唔會互相排斥。八方都好同意佢話：叫啲人上京，不如叫教授落嚟；而且個團明明都唔成行，政府攞番主導權，都未嘗不可，發叔都唔好咁勞氣喇。
傳真︰2623-9278
電郵︰[email protected]