現貨月期指噚日結算，大市走勢好反覆，跌過30點，亦升過近百點，收市14813，仍有11點進帳，成交又上番235億元。大市先升後回，主要係滙控（005）在午後沽盤湧現，一度插到落125.90元，收126.20元，跌0.80元，成交27億元，好淡都撼得好激烈。滙控下周一派成績表，由於會計政策改變，好多人睇唔透，沽定等宣布。
雖然滙控壓力大，但短期後市仍可看高一線，升埋下禮拜，先會出現一次較大幅度嘅調整，屆時藍籌唞氣，呢個升浪一直「冇聲出」嘅二三線股，點都會輪到。不過，細價股多地雷，風險大，上陣前要做好功課。
兩隻大藍籌，境遇迥異，滙控造落，中移動（941）就造上，收31.10元，升0.30元，成交又上番2380多萬股。由於大戶仍然㩒實滙控，所以，短期嘅升浪，仍要借助中移動發力。
中移動本月初由27.70元起步，一直升上31.20元，才出現整固，形成旗形，噚日走勢再轉強，若破位而上，短期量度上升目標係35元。
為電訊業重組得益者
美林最新出的研究報告，強烈推介中移動，指內地電訊業重組推遲，以及第3代流動電話的推出，有利中移動保持行業競爭優勢，目前中移動盈利被低估，其05年度（12月年結）及06年度盈利預測分別調高1.3%及6.3%，至454.7億元及505億元，維持買入的投資建議，目標價由29元提升到36元。
中移動C輪可吼3637，今年10月到期，溢價2.4%，槓桿率有16.8倍，行使價30元，中移動若升4元，3637以平水計，可見0.50元，噚日3637收市價0.185元，預期升幅係170%！
內地媒體近日多次傳出電訊業重組消息，雖有公司表示短期內不會實施，但事在必行，估計最遲明年上半年即會公布。事實上，中移動基本因素良好，現時的消息係會併購中國衞通，在重組過程中面對的不明朗因素相對最少，故係重組行動的最大得益者。BNP百富勤對中移動的評級係「買入」，目標價35.40元。
國企榮辱互見，吉林化工（368）以1.98元的高價收市，升0.11元，成交大增，可以上移止賺位繼續持有。
郭兆誠