正所謂「台上一分鐘，台下十年功」，要問鼎比賽獎項，背後可能花上不止十年功夫。歐師傅入廚超過三十年，他所製作的糕點個個有名堂，上過電視節目，甚至有日本電視台特意來追訪及拜師學藝，今年他特別創作的「杏汁銀耳萬壽糕」，正是準備用作參加烹飪比賽「食神爭霸戰」的秘密武器！
記者：陳敏琪
攝影：黃子偉
Model：Wing@TheGroup
杞子菊花糕響朵！
你可能已聽過杞子菊花糕，這個上過飲食節目《近廚得食》由杞子菊花糖水所製成的甜點，深受歡迎，正是由歐師傅所創。歐師傅，土生土長的香港人，自言讀書無成，自13歲就開始學廚，跟經驗老到的大師傅學煮上海菜。代表作杞子菊花糕就是歐先生去年為土瓜灣「特色」京川滬菜館而設計，成為城中飲食熱話。今年，歐師傅於銅鑼灣開分店，再接再厲研究設計出另一款糕點──杏汁銀耳萬壽糕，特色為由糖水製成。這款滙聚師傅三十年功夫的作品，花了歐師傅整整一年時間研製。
不傳秘技入口即溶
看此糕造型，可清楚看到有三層，上下兩層為杏汁，中間夾着橙紅色的為木瓜雪耳糖水，每次製作一底要花半小時，難度在於要一層凝固後再鋪上另一層，而每層之間太硬會黏不牢，太軟又不能凝固。研製成果是這塊萬壽糕鬆軟，咬落軟如棉花，入口即溶。師傅話：「馬豆糕、紅豆糕等都加入大量的魚膠粉，凝固後比較硬，我的杞子菊花糕採我獨家秘技，並沒有加入任何魚膠粉；而萬壽糕就加入了小量的糯米粉。」
去年構思期間，曾有日本電視台因為聽聞了歐師傅的廚藝，特別派來男藝人跟他拜師學藝，並且製作了一個飲食節目。而歐師傅除咗教授日本徒弟仔廚藝外，更將杏汁銀耳萬壽糕的構思與徒弟分享，徒弟仔亦給予了意見，歐師傅最終再改良糕點的甜味及外觀，在糕面鋪以豆沙醬，這副為準備參加食神爭霸戰（甜品組）而設的武器終於大功告成！
杏汁銀耳萬壽糕$18（2件）
面同底都係杏汁糕，中間一層是木瓜雪耳糖水，令糕點更有層次感，而糕的質地雖然看似固體，但咬落卻係軟綿綿，而且入口即溶，回復糖水本來的清甜。
杞子菊花糕$15（4件）
去年的佳作，但時至今日都依然深受食客歡迎。歐師傅看準廣東人愛滋補糖水，但未必人人會肯花時間去煲，就設計了這款糕點。杞子明目、菊花清熱，而杞子在菊花糕包圍下，入口不會變腍，相反嚼起來重帶點煙韌㖭。
桂花酒釀湯圓$16（4粒）
酒釀固然香醇，加入桂花就多帶幾分清香，再以湯圓代替丸子就倍感新鮮。湯圓有黑麻茸、白麻茸及奶皇蛋黃選擇，湯圓外皮用糯米粉製成，薄而不黐牙，最特別的是圓圓的湯圓外層完全看不到包餡的瑕疵，全憑師傅的一對巧手。
軟脆豆沙棗$15（3件）
食物也可以再生？歐師傅看過太多番薯糖水因為煮多了而被人棄掉，他靈機一觸，用糖水中已經充滿甜味的番薯壓為薯茸，加入糯米粉，再以豆沙作餡，以油一炸，番薯糖水搖身一變成為豆沙棗，外皮香軟而脆口，內裏甜而不膩。
同場熱食推介：上海×四川麵
甜品當然美味，但特色的又何止係糕點、湯圓？重有就係湯麵啦！中國麵大家就食得多，但又想有四川擔擔麵湯底，又食到上海的醉雞，重要有湯麵，冇問題，「特色」的湯麵，大家除咗可以揀麵底，重有六款湯底俾大家揀：清湯、濃湯、擔擔湯、麻辣湯、酸辣湯（另加$5），每一款都用料十足。
清熱健康飲品
注重健康係歐師傅的堅持，所以舖內亦有售銀菊露、薏米水，呢兩杯飲品唔係機製，而係有專人特別烹調，無論味道或者心意都比得起屋企阿媽自家煲嘅涼茶。
「特色」面點．湯圓（28878312）
地址：香港銅鑼灣電器道69號發昌樓地下（天后地鐵站A2出口）
營業時間：11am-12pm
座位：28位
