去過新地觀塘apm商場嘅，都知佢哋搞咗個舞台仔，畀公眾上台高歌一曲，聽聞至今已經有過百人上過台，而且重吸引咗唔少新紮歌手，甚至有樂隊遠道由日本過嚟表演一番。
好似日本嘅Rairaira結他樂隊，就係因為搭飛機時見到新地嘅宣傳，於是就向新地自薦，終於做咗呢個活動嘅七月之星。聽佢哋講，原來大阪都有啲商場，會畀人上去唱歌，佢哋覺得，apm呢個活動幾啱口味，所以就過嚟。
新地重搵咗由美加回流嘅男子樂隊DearJane做八月之星，而近期網上大熱嘅歌手陳曉琪，就做九月之星。
講開又講，新地為咗宣傳個商場，遲啲會搞份apm雜誌，響紐約、倫敦、新加坡、日本、台灣同香港發行，搞到咁大陣仗，難怪佢哋要用八位數字嘅預算，打響頭炮做宣傳。不過咁，原來佢哋商戶嘅生意額都增加咗兩成，估計遲啲人民幣升值，八月個場嘅生意額會再增半成至一成。