○六年嘅特區政府，有好多好多嘢要預備，例如選委會選舉、特首選舉同區議會選舉等等，所以政府新聞處都要請多啲人幫吓手先得。
有見及此，新聞處近期靜靜地進行招聘，話想招聘一啲喺傳媒界有五年工作經驗以上嘅人加入，不過就只係有一年合約，即係唔係食長期飯票嘅公務員啦。
雖然冇鐵飯碗，但政府出手一啲都唔低，獲聘者月薪高達三萬四千九百二十蚊，表現好嘅人，重可以攞到百分之十五嘅約滿酬金，都咪話唔吸引。據知今次新聞處大概想請四個人左右，都算少位。
八方知道負責面試嘅，可能係新聞處老臣子。到時見番平時撞口撞面嘅行家應徵，唔知邊個會尷尬啲呢？
傳真︰2623-9278
電郵︰[email protected]