漫畫節，曾經極度巴之閉，個個港產漫畫家都趕住推出新作，各大漫畫公司重請埋當紅日本漫畫大師撐場，大鑼大鼓，絕對係星光熠熠耀會展！今時今日，雖然再睇唔到漫畫家空群而出嘅大場面，但就更加多元化，電玩、玩具、Cosplay、跳舞比賽一樣開正漫畫迷嗰瓣，加上玉皇朝、天下呢兩個港漫巨頭依然擔大旗，新書、新精品繼續推，重搵嚟不同範疇嘅單位玩Crossover，增添客路之餘重擴闊埋漫畫迷眼界，令香港漫畫迷唔使做秋葉原自閉電車男。
記者：馬慶武
攝影：楊錦文、陳盛臣
鐵人闖天下
客觀啲講，馬Sir嘅畫工、鐵人兄弟嘅手工，唔算最強都可以話係獨步天下。兩大強勁單位玩Crossover，重要唔係齋「幫吓手」咁簡單，鐵人兄弟首先設計出亦正呢個角色，馬Sir就創作故事背景再將佢平面化加入風雲故事裏面，成為第一個出現喺風雲裏面嘅Crossover角色，成件事搞到好大，玩得好盡。由上年漫畫節，馬Sir同鐵人兄弟相遇，用咗差唔多一年時間完成。完成品亦正Figure會喺今個漫畫節登場，漫畫迷、玩具迷，以及大多數漫畫玩具迷都準備搶貨，限量生產1,000隻，但貫徹鐵人風格──製作需時，現場現貨只有300個，必然極速斷市！想即買即玩？晨早排隊走唔甩。
天下Figure
4.5吋公仔強化版（$108-$168/個）
一套7個，亦曾經隨特別版天下畫集附送，已絕版，今次加強版更加入半透明火麒麟、大邪王盒等情境。
10吋手辦公仔（$880）
之前推出了聶風，今次漫畫節就輪到步驚雲，送雲影翻飛海報及武者系列小冊子，限量50個附有金屬版絕世好劍。
其他推介
天下攤位：D42-43
盒蛋專家打做最強立體王小虎
超經典港產漫畫「龍虎門」內嘅角色第N次立體化，但今次由曾經製作幾米、東京暴族2系列嘅本地盒蛋專家How2work製作，就完全捉到新作嘅角色神態。王小虎嘅正氣、王風雷嘅高傲、翻江蛟嘅陰險都表露無遺，咦？唔見阿小龍同黑龍嘅？邊有咁快儲齊一套龍虎群英吖，嗱嗱聲抽個王小虎傍身先啦！
玉皇朝盒蛋（$32/個）
共8款，約3吋高，以抽賣形式發售，漫畫節優先推出，最穩陣係買1箱12盒，一定齊晒8款，買滿兩箱重送黑魂特別版一隻。不過最恐怖都係會有一款隱藏胸像，以120分1機會出現！
玉皇朝攤位：C8
文傳漫畫精品
文傳攤位：
B50-51（本地漫畫）
B68-69（日本漫畫）
