期指結算前夕，港股表現反覆，午後大市明顯被刻意挾高，最終重上14800水平收市。
今年嘅8月1日將有特別多事發生，市場傳中央會公布包括將聯通集團拆骨的電訊業重組方案，搞到噚日銀彈亂射，刺激聯通（762）勁升3%至6.95元，而期指好友就可以唞唞，小休1日，唔使出盡力托住隻中移動（941）。
聯通拆骨方案快出台
傳聞中的方案是衛通併入中移動集團，聯通GSM與北方鐵通入中電信集團，聯通CDMA與南方鐵通入網通集團，而上市聯通其實持部份GSM，基本上無持有CDMA網，不過為咗方便重組，應該會進行私有化，而代價可以是現金亦可以是中電信（728）股份，但相信出手唔會太慷慨。中電信噚日勁升3.4%至2.975元，網通（906）升1.6%至12.05元。
若無記錯，8月1日亦是和記環球（757）股東選擇收現金代價每股0.65元還是每持21股收2股和記電訊（2332）股份的日子。噚日和記電訊勁升4.4%至9.30元，若選收股份，相當於每股收0.8857元，睇起嚟比現金代價高好多，十分誘人，但e莉莎話，最怕係當揀咗股份代價之後股價唔生性就弊家伙。
8月1日重係滙控（005）及恒生（011）公布中期業績嘅日子，市場開始憧憬滙恒業績會比預期好好多，若果業績有何閃失，大市可能要進行一次較大型的調整。
中意控股（1198）本來已出現人事重大變動而引起基金關注，喺呢個敏感時期，重夠膽配股集資1億元，實在令阿虎佩服得五體投地。中意一度大跌23.3%，不過有維持秩序買盤接貨，將股價推回5元配股價水平，跌幅收窄至13.7%。
阿虎