本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如僱主或僱員有任何疑問，可致電勞工處熱線查詢：27171771，熱線由「1823政府熱線」職員接聽。
老婆：下星期日阿仔兩歲生日，不如喺屋企搞個生日會，叫我哋個外傭Lily姐姐唔好放假，幫手整嘢食同清潔啦。
老公：咁要同佢安排調假喎，唔知佢肯唔肯呢？
老婆：如果佢唔肯就不如叫佢放半日，下晝返嚟幫手，補番半日人工畀佢咪得囉。
老公：但係《僱傭條例》規定，外籍家庭傭工同我哋一樣，有連續性合約嘅話，每七日可享有不少於一日嘅休息日。休息日嘅定義係連續唔少於二十四小時內，僱員有權唔為僱主工作喎。計我話不如清清楚楚，同佢另外定休息日代替啦。
老婆：但係我呢排好忙，好難請假留喺屋企畀佢休息喎。不如補足一日人工畀佢，叫佢唔好放假啦。
自願工作亦須補假
老公：都係要佢自願喺休息日工作先得。其實佢做咗成個禮拜，我都想佢休息吓充吓電。
話時話，另定休息日可以安排喺同一個月內嘅原定休息日之前，或者喺原定休息日後嘅三十日之內，咁你請到假啦啩。
老婆：啊，我有個更好嘅安排，包保無違反勞工法例。下星期日就由你負責喺屋企整嘢食同清潔，咪最清清楚楚，乜假都唔使調啦。
以上資料只用作說明《僱傭條例》的相關條文，對於法例的詮釋，應以《僱傭條例》為依據，如有爭議，則以法院的判決為最後依據。
資料提供：勞工處勞資協商促進科
服務熱線
電話：29908288
傳真：23702192
電郵：[email protected]