煲呔愛將鬍鬚仔曾俊華（圖）噚日又啟程去咗瑞士日內瓦觀察世貿全體理事會會議，星期六先返香港。鬍鬚曾一定要搞好十二月喺香港舉行嘅世貿第六次部長會議，務求取得「進取同平衡」嘅成果，呢個目標睇落容易，但係採訪過世貿會議嘅行家都知其實好難。
由於今次理事會會議希望出到香港部長級會議宣言嘅「第一份約稿」，等個會有啲睇頭，鬍鬚仔幾忙幾辛苦都要親自出馬，港台單蘇州屎暫且按下不理。
八方聽聞，自從上次立法會班議員要求鬍鬚仔就港台數碼化、港台搬遷去將軍澳以及港台公司化喺十月復會後提交報告，港台中人非常高興，以為會有大轉機，所以已經定咗喺十月二十九日舉行公眾諮詢，希望社會各界可以就港台嘅前景進行大辯論，迫政府做吓嘢。
港台問題實在好攞命，因為到時成個特區政府都為世貿部長級會議忙到失暈，鬍鬚仔重係專責官員，邊得閒睬港台。
傳真︰2623-9278
電郵︰[email protected]