牛牛皮皮又一日，恒指全日波幅得85點，成交仍在200億元樓下。正如早幾日所講，本周期指結算，大戶轉倉忙，加上下周一滙控（005）公布中期業績，在揭盅前，大市波幅傾向收窄，並有機會作出健康調整。
講到調整，大市係都唔肯跌，恒指前日微挫24點後，昨日又回升31點，收報14801。照個勢睇，可能要到結算之後甚至下個星期，似樣嘅調整方會出現。
中國人壽（2628）已按原定部署買入，目標價為6.05元，暫以跌穿10日線（5.535元）止蝕。鞍鋼（347）一度跌穿3.825元計數位，但很快重回其上，仍然持有。莊士機構（367）收低於10日線（0.705元），似在轉弱中，今日若不能重返該線之上，就要計數。
兗煤（1171）業績「走光」，上半年銷售收入增3成，利潤總額增幅約5成，呢張成績表若然係真，已可飲得杯落。兗煤盤數咁靚，同類股神華能源（1088）追得過，話晒資產質素比兗煤更高。
里昂剛發表報告推介神華，評級為「跑贏大市」，目標價睇8.9元。里昂預測神華05年度純利153億元人民幣，大升71%，06年度則再升7%。
短炒C輪3939
神華招股價7.5元，昨收7.9元，只係高出5%，坐咗貨嘅大戶照計未有機會賺錢鬆人，始終要搵機會舞上。股價昨已升破旗形降軌，前高位8.05元會有阻力，但一旦突破，就會望空衝刺。
今日期指結算，明日場外結算，好友呢個月贏到開巷，除非外圍出事，相信在高位結算的機會甚大。恒指今日若非開得太高，可以短炒（不是揸）一轉恒指C輪，對象係3939，9月尾到期，溢價1.97%，槓桿率30倍。
趙飛雲