周星馳嘅電影有好多經典對白，早排馮仁昭有朋友用電腦節錄咗佢把聲，攞嚟做電話鈴聲，好似《唐伯虎點秋香》唱嘅「燒雞翼，我鍾意食……」或者同「對穿牆」鬥對對咁，估唔到近來內地都有類似嘅情況，不過就係為咗賺錢嘅。
最高炒到千五蚊
以往一直幫星爺做國語配音嘅石班瑜，佢將自己幫星爺電影配音所講嘅對白，放上eBay拍賣，內容除咗有生日祝福、溫暖情話同朋友互相問候嘅對白之外，最搶手嘅係星爺電影嘅經典對白，好似《西遊記之仙履奇緣》入面嘅「曾經有一份真摯的感情擺在我的面前……」咁，就吸引咗好多人去競投，有啲對白重炒到千五蚊。
石班瑜幫星爺做國語配音，賣嘅變相就好似係星爺把聲咁，本來把聲係石班瑜應該就冇問題，但因涉及電影對白，所以就有侵犯版權之嫌。星爺嘅星輝公司發言人魏先生得悉呢件事後好愕然，話石班瑜係獲邀幫手配音，佢拍賣相關嘅電影對白係屬於相關電影製片公司所有。
而星爺唔會作出評論，費事俾人炒作，星輝亦唔會插手，不過電影公司就會追究，至於點樣追究就由佢哋去處理嘞。