正所謂有名就自然有利，用呢句話嚟形容《我的名字叫金三珣》（前譯：金三順）裏面嘅四位演員就最貼切，最近男主角玄彬、女主角金善雅以及男配角Daniel同女配角鄭麗源都紛紛現身各大廣告同宣傳活動，個個都豬寵入水。
化身騎呢師奶
《我》劇嘅結局收視衝破五十大關，同金三珣呢嗰角色受歡迎有好大關係，女主角金善雅當然亦因為咁而人氣急升，最近金善雅就接拍咗一個健康飲品嘅廣告，佢喺廣告裏面成副師奶樣，髮型衣着騎呢不在話下，重俾小朋友叫佢做嬸嬸，非常搞笑。
至於男主角玄彬唔單止不停被選為最佳男友、最合襯男演員，廣告合約亦都密密咁嚟，除咗接替足球選手安貞煥成為化妝品代言人外，又將會去澳洲拍攝服裝廣告，嚟緊重會同時裝雜誌拍封面㖭。
情深對望親熱
而Model出身、美籍韓裔嘅Daniel同前組合Chakra成員嘅鄭麗源都唔執輸，佢哋啱啱就一齊拍咗個橙汁廣告，兩嗰喺入面四目交投，又攬又咀，好似拍緊電視劇嘅延續篇咁。另外，Daniel前日又現身首爾奧林匹克酒店所舉行嘅夏令營活動，向在場一班混血兒童講吓種族歧視問題。