跌幅超過10%嘅股份，有接近20隻，其中有啲仙股，跌幅講緊兩三成以上，睇見都心驚驚。大市有幾隻大嘢撐住，恒指有得升，進帳31點，其中中海油（883）與聯通（762），總共帶起恒指28點，即係其他31隻恒指成份股，夾埋只係微升3點。
中信C輪4483：喺今個回合升市，中信泰富（267）比較落後，尤其跑輸畀太A（019）。中信有機會追番些少上去，吼位買相關C輪。
中信C輪兩隻手掌數晒，得9隻，最熱門係4483，呢隻數據亦算係最靚，10月中夠鐘，輪價24.2仙，溢價1.3%，槓桿率9.5倍（有效7.3倍），引伸波幅28.5%。昨日有28球易手，金額接近7球。同日到期嘅3983，數據更加靚，只不過買賣好難。
恒指P輪3631：昨日推介恒指P輪9142，跌3格。呢隻對恒指反應嘅敏感度，及唔上3631。3631喺9月尾夠鐘，輪價8.3仙，溢價0.9%，槓桿率20.3倍（有效15.4倍），引伸波幅13.4%。賭呢隻，要轉身快，炒即市可以諗吓，博大市升唔得乜嘢出樣，但又要提防大市挾淡倉，注碼宜細。
章盛