星期一本港各報報道酒店業好景，下半年商務旺季碰上世貿大會，港島甲級酒店「爆房」，一級酒店由十月至十二月，一房難求。
中文大學酒店及旅遊管理學院院長李金漢教授係市場學專家，識得做公關，早一日見記者講酒店業前景，介紹中大酒店系學生就業情況。本來呢啲「行貨」唔易見報，但碰啱時機，各報一律以大篇幅報道，李金漢得其所哉，大概唔少學生睇埋咁多酒店業好景嘅新聞，心思思會去報讀酒店系。
一位讀者張先生來電郵，講及佢想去瑞士讀酒店管理課程，但有兩個顧慮，一係學費，二係在網頁中見到瑞士酒店學院協會嘅成員學校之中，亞洲學生比率甚高，驚住過到去，學唔好英文。
張先生要左丁山畀意見，等佢在八月前有所決定。冇所謂，只要做得到，我哋一定為讀者服務。嗱，左丁山以前講過酒店小ＹＹ，佢二○○三年去瑞士讀一年期（畀大學學位持有人讀）文憑課程，讀完後在倫敦、紐約超級豪華酒店打工。據小ＹＹ講，去瑞士讀酒店管理，一啲都唔平，佢間學校一年要六萬瑞士法郎，唔易捱。學校內有好多大陸學生，普通話成為第一溝通語言，第三先至係法文，第二就係英文嘞，課本、教學，全部用英語。一啲大陸學生去瑞士，係問政府借錢嘅，回國後分五年償還。可惜香港冇機構會借錢畀你去瑞士，攻讀酒店管理，請張先生（啱啱中七畢業）諗清楚，如無法籌到六萬瑞士法郎（三十六萬港元），不如留港攻讀酒店管理文憑，之後打工，儲蓄兩三年之後先至諗去瑞士。
小ＹＹ話瑞士酒店管理學校學生之中，第一多係中國人及亞洲人，第二多係南美人，第三先至係歐洲人，三類人如要互相溝通，一定要講英文，不過想學好啲英文，希望就細啲咯。