小初記得6月初，文化傳信（343）斥資過億元收購美國一項微處理器資產及技術，兼發行3億元可換股債券，曾引起話題兼股份一度受追捧，但隨着單交易公布後，文傳股價開始腳仔軟軟，早兩日公布全年業績勁蝕1.63億元後，股價就更好似食咗瀉藥咁。
經紀陳話，文傳早排股價已經積弱，出嚟嘅業績咁樣就更加令人失望，而市場隨即又傳單收購未必搞得成，就算呢單收購搞得掂，但配售債券呢一筆都好難搞得掂咁講。
佢話，文傳6月份公布收購之時，股價約在0.33元至0.34元，但債券換股債要成0.60元咁高，家陣文傳股價更得0.20元左右，除非投資者信心好大，否則換股價較市價出現咁大溢價，實在好難叫人認購。
文傳昨日再跌11.7%，收0.202元，成交金額1621萬元。
另外，久違嘅濠賭股黃金集團（1031）急升8.1%，收2元，成交金額2281.5萬元。經紀陳話，早排一度被股壇長毛質疑的出售資產交易，將於今日在股東會上表決，有人覺得無問題搞得掂，故此先行偷步炒上。
慕容小初