八方日前見到飛哥，佢着住件紅色恤衫，成個𡃁仔咁款。飛哥同八方講，上周六詹德隆請大家睇《東宮西宮之西九龍皇帝》（加強版），張敏儀本來都話嚟，後來冇出現。
飛哥話成套《西九龍皇帝》加強版都好好睇，只係最後嘅香港家書無厘頭咗啲，猛咁影啲樹木嘅變遷，比較悶。
八方問佢今年會唔會好似往年咁同馬丁一齊去旅行，佢話唔會，因為馬丁掛住送個仔返英國讀書，佢自己就準備八月同老婆先去美國，然後十月就去歐洲遊船河。
馬丁嘅假期安排一向由老婆負責，所以佢都唔知會幾時出發去歐遊，八方問佢怕唔怕倫敦有炸彈，馬丁話，邊到怕得咁多，反而白鴿黨最近咁多事，令佢更加擔心，喺電話筒入面不斷唉聲歎氣。
爆料熱線：29290000、27860099
報料傳真：26239278
報料電郵：[email protected]