二十九歲嘅張燊悅以前同雷頌德拍拖時，例牌神神秘秘，好難會喺公眾地方見到佢哋拖吓手仔攬吓腰，但自從佢同雷頌德分咗手，識咗任職航運業嘅打工仔新男友後，唔知張燊悅係咪冇晒束縛，即刻變得戀愛大過天，話之旁人點睇，情到濃時一於要攬就攬、要咀就咀！
大前日凌晨兩點零鐘，着住金龍印花緊身背心同爛牛仔褲嘅張燊悅，同男朋友去咗中環蘭桂坊Volar酒吧夜蒲，當時佢哋好親密咁並肩坐喺靠牆嘅長座位，唔知張燊悅係咪喺酒精嘅刺激下變得零舍豪放。
瞇埋雙眼享受
張燊悅同男友坐吓挨吓，就攬實咗男友，身貼身咁狂咀佢塊面，俾女友咁錫法，男友梗係冧到震，血氣方剛嘅佢即刻瞇埋雙眼，抱實女友條腰任佢啜，個樣重係極度enjoy㖭！
不過可能有記者喺場外守候所致，張燊悅喺凌晨四點零鐘就由一個女性朋友拖住離場，同行就未見佢男朋友。其實張小姐又唔使咁多顧忌嘅，反正佢同男友戀情又唔係第一次曝光，都已經俾雜誌影到佢哋當街濕吻，再激吻都唔太出奇啫。